सुपर फास्ट बातमी

09-11-2024

Vairagd news: दारूविक्रेत्यांनंतर गुटखा व्यावसायिकांवर कारवाई ,आरमोरी पोलिसांची धडक मोहीम सुरूच

वैरागड, (वा.). आरमोरी तालुक्यातील महत्त्वाचे केंद्र असलेल्या वैरागडसह परिसरात मोठ्या प्रमाणात अवैध धंद्याना ऊत आले आहे. दारूविक्रीसह इतर अवैध धंद्यांना या भागात जोम चढला असताना आरमोरी पोलिसांनी दारूविक्रेत्यांवर धडक कारवाई करीत दारूविक्रीवर काही प्रमाणात अंकुश लावले आहे. अशातच शुक्रवारी (दि. 8) आरमोरी पोलिसांनी वैरागड येथील पानटपरीवर धाड टाकून गुटखा विक्रेत्यांवर कारवाई केली. आरमोरी पोलिसांच्या या धडक कारवाईमुळे अवैध व्यावसायिकांचे धाबे दणाणले आहेत.

वैरागडसह परिसरात दारूविक्रीसोबतच गुटखा विक्रीचे प्रमाण वाढले आहे वयस्का पासून महिला, लहान मुलेही गुटखा, खरांच्या आहारी गेले आहेत. यावर उपाय म्हणून आरमोरी पोलिसांनी शुक्रवारी गावातील प्रत्येक पानटपरीवर धाड टाकत सुपारी, तंबाखू (इंगल) आणि इतर साहित्य जप्त करीत संबंधितावर दंडात्मक कारवाई केली. त्याचप्रमाणे गावातील किराणा दुकानांमध्ये तंबाखू विक्रीबाबत चौकशी करण्यात आली. तंबाखू, गुटखा विक्रेत्यांविरोधातील या धडक कारवाईमुळे पानटपरी चालकांचे धाबे दणाणले असून गावातील अनेक पानटपऱ्या या कारवाईमुळे बंद ठेवण्यात येत आहेत. येथील ग्रामीण परिसर शेती, मजुरी आणि व्यवसायावर अवलंबून आहे. यावरच नागरिकांचा उदरनिर्वाह चालत असते. पानटपरीच्या माध्यमातून आपल्या कुटुंबाचा उदरनिर्वाह करणाऱ्या गरीब व्यावसायिक पोलिस विभागाच्या या कारवाईमुळे हतबल झाले आहेत. शासन, प्रशासनाने छोट्या व्यावसायिकांवर कारवाई करण्यापेक्षा तंबाखू बनविणाऱ्या कंपन्यावर कारवाई करावी, अशी मागणी पानटपरी व्यावसायिकांकडून होत आहे.