आरमोरीचा पराभव जिव्हारी ,भाजपच्या विशिष्ट नेत्यांकडून गुप्त चौकशी; विद्यमान आमदार पडलेच कसे ?

 गडचिरोली. जिल्ह्यात सहज निवडून येईल, अशी आरमोरीची जागा भाजपने गमावली. त्यामुळे भाजपला जबर धक्का बसला आहे. सहकार क्षेत्राचे प्रचंड प्रस्थ असलेल्या आरमोरी विधानसभा मतदारसंघात विजय समोर दिसून येत असताना अचानक या विधानसभा निवडणुकीत विद्यमान भाजपचे आ. कृष्णा गजबे यांचा पराभव झाला. त्यामुळे भाजपचे वरिष्ठ नेतृत्व अचंबित झाले असून हा पराभव त्यांच्याही जिव्हारी लागला आहे. पराभव नेमका झाला कसा ? यावर वरिष्ठ पातळीवर खलबते सुरू असून भाजपचे काही विशिष्ट नेते याबाबत गुप्त चौकशी करीत असल्याची माहिती आहे. स्थानिक पदाधिकारी मात्र याबाबत अनभिज्ञ असल्याचे दिसून आले.

अनुसूचित जमातीसाठी राखीव असलेल्या महत्त्वाच्या आरमोरी मतदारसंघात ज्येष्ठ सहकार नेते अरविंद सावकार पोरेड्डीवार व प्रकाश सावकार पोरेड्डीवार बंधूंचा मोठा पगडा आहे. त्यामुळे आजवर या मतदारसंघात कोणतीही निवडणूक म्हटली की, सहकार क्षेत्राचा प्रभाव दिसून येतो. आरमोरी विधानसभा क्षेत्रात पोरेड्डीवार बंधूंचा मोठा दबदबा आजही कायम आहे.

या भागातील कोणतीही निवडणूक म्हटली की, या दोघांना कुणालाही डावलून चालत नाही. त्यामुळे जवळपास सर्वच राजकीय पक्ष या त्यांचा सल्ला नक्कीच घेतात, असा आजवरचा सर्वांचा अनुभव आहे. त्यामुळे विधानसभा निवडणुकीत या बंधूंची भूमिका महत्त्वाची होती. मात्र या निवडणुकीत त्याला ग्रहण लागले. एक साधारण कार्यकर्ता राहिलेले कृष्णा गजबे यांना सलग दोनदा आमदार बनविण्यात पोरेड्डीवार बंधूंचा मोठा वाटा होता.

 या पार्श्वभूमीवरच आ. गजबे यांना पुन्हा संधी देत भाजपने मैदानात उतरविले होते. सलग तिसऱ्यांदा गजबे हे या क्षेत्राचे आमदार बनतील, असा सर्वांना विश्वास होता. मात्र, काँग्रेसचे नवखे उमेदवार रामदास मसराम यांनी त्यांचा पराभव केला. त्यामुळे भाजपला जबर धक्का बसला आहे. विजयाची प्रचंड खात्रीबाळगून असलेल्या भाजपने या मतदारसंघावर फारसे लक्ष केंद्रित केले नसल्याचे परिणाम भोगावे लागले की अन्य काही कारणे या पराभवामागे आहेत, याची चाचपणी आता प्रदेश पातळीवर केली जात आहे. यासाठी काही विशिष्ट नेतेमंडळी गुप्तपणे याबाबत चौकशी करीत असून ते आपला अहवाल नेत्यांना सादर करणार असल्याचे सूत्रांनी सांगितले

आरमोरी विधानसभा क्षेत्रात काँग्रेसने आतापर्यंत आठ वेळा विजय संपादन केला आहे. त्याखालोखाल शिवसेनेने तीन वेळा, तर भाजपने दोन वेळा या मतदारसंघावर विजयाची पताका फडकावली. एकवेळा अपक्ष उमेदवाराने याठिकाणी बाजी मारली.

.