सुपर फास्ट बातमी

29-11-2024

Chandrapur news : दुचाकी-ट्रॅक्टरच्या धडकेत तिघांचा मृत्यू

बोथली येथील घटना; तिन्ही तरुण मित्र एकाच गावचे; दुचाकीने दिली धडक

सावली, (ता.प्र.). तालुक्यातील बोथली येथे दुचाकी व ट्रॅक्टरच्या धडकेत तिघांचा मृत्यु झाला. ही घटना बुधवारी (दि. 27) रात्री घडली. साहिल अशोक कोसमशिले (19 रा. बोथली), हर्षल संदिप दंडावार (21, रा. बोरचांदली) साहिल नंदु गणेशकर (20, रा. तळोधी) अशी मृतांची नावे आहेत.

बोथली येथील साहिल अशोक कोसमशिले या मित्राला भेटण्यासाठी एमएच-34/एल-3229 क्रमांकाची दूचाकी घेवून हर्षल संदिप दंडावार व साहिल नंदु गणेशकर हे बोथली येथे आले होते. तिघेही मित्र हे रात्रीच्या सुमारास दुचाकीने जवळच असलेल्या हिरापूर येथे नाटक बघण्यासाठी निघाले होते. वाटेतच मार्कंडेय विद्यालयाजवळ एम-34/एपी- 1042 क्रमांकाचा ट्रॅक्टर वळण घेतअसतांना, दुचाकी ट्रकला जाऊन धडकली. धडक एवढी भीषण होती की, हर्षल संदिप दंडावार हा जागीच गतप्राण झाला.तर दोघे गंभीर जखमी झाले. जखमींना सावली येथील ग्रामीण रुग्णालयात उपचाराकरीता दाखल करण्यात आले. सामान्य रुग्णालयात नेत असतांना वाटेतच साहिल नंदु गणेशकर याचा मृत्यु झाला. तर सामान्य रुग्णालयात साहिल अशोक कोसमशिले याचा उपचारादरम्यान मृत्यु झाला.

सावली तालुक्यावर शोककळा

सदर तरुण हे गंभीर जखमी असल्याने पुढील उपचाराकरीता त्यांना गडचिरोलीचे सामान्य रुग्णालयात भरती करण्यात आले. परंतु. वाटेतच साहिल नंदु गणेशकर याचा मृत्यु झाला. तर सामान्य रुग्णालयात साहिल अशोक कोसमशिले याचा उपचारादरम्यान मृत्यु झाला. तिन्ही तरुणाच्या मृत्युने गावात हळहळ व्यक्त करण्यात येत आहे. घटनेचा पुढील तपास सावलीचे पोलिस स्टेशनचे पोलिस निरिक्षक पुल्लुरवार यांच्या मार्गदर्शनात सहायक फौजदार चरणदास मडावी, पोलिस शिपाई अमोल गणफाडे, पोलिस शिपाई मोहन दासरवार करीत आहेत.